Lam 3 | MPS | STEP | Ena e po asębo bidi, eno te dene tolobo kolesaga konebo dao. Genuai Bidigo ena dali sębę yalio, tama ena dene manio. Tama eno genuai dene mu tolalio.

Lamentations 3

Eno homu begelama, Genuai Bidigo eno sęgę dabe silibo tonalubao

1 Ena e po asębo bidi, eno te dene tolobo kolesaga
konebo dao.
Genuai Bidigo ena dali sębę yalio,
tama ena dene manio.
Tama eno genuai dene mu tolalio.
2 Agai ena mu hulia sai sunumidu mu pomainu ilalio.
3 Tama tigidali sogo agai ena deli naga dene madu
gebo dao.

4 Te agai ena elai tiwai elama,
tama eno dili dabe tigidali mu togwa pelama,
tama eno tigi aboga sai.
5 Agai enabolo haniani sęgę mayu,
dene mayu elama,
tama te nai dabego ena bagua selama, kalabus
ilalio.
6 Agai ena hulia sai madi bidimainu ilalio,
te polobadu mu isai bidi dabe tiwai mu tama tiali.

7 Agai ena polo kalabus ilali,
tama ena wi pabo usu egobeo.
Te agai eno nogo sągą te sęgę yai sen bonogo kęai tiwai
elama,
tama ena bilabo usu menio.
8 Eno i olama, Genuai Bidibolo ena tau sao po olama,
hanalubo dao.
Tiali goli, agai eno gedu haluasa po
waboba olo saganama, odobo menio.
9 Te tigidali badu ena painu yali madi,
agai polo palia sesa bilalio.
Te genuai masigi sunumide paliai tiwai
ąǫ yalio, te ena pabo sunumide.

10 Genuai Bidigo ena dolainu tonaluali,
te bulu hasa bea me laion sigo
te hasa dabe soabo tonaluyu, dualalubo tiwai yalio.
11 Genuai Bidigo eno sunumi tagalomainu elama,
tama agai ena dolalio,
te laion de bea sigo hasa pobeasa peyu,
te hasago tigi togola tagalobo tiwai yalio.
Tama tialigo ena dolama mu bidibao.
12 Genuai Bidigo aga ene enesigiba
tulama, tama ena enani.
13 Tama agai ena haligade genuai mu enani,
agai te ene dabego.
14 Megi da, eno we bidi hani tigidali
augwali gisugu dwai mu olama,
tama ena kęnę mayu, balia po wabo dao.
Awe, kigamu me, giligade me, pio me,
tigidali sogo balia po wabo dao.
15 Agai ena sęgę hauwa mu mani,
tama ena mu pągąna palio.
Te agai ena dene dali sęgę dali si mayu,
ena pągąnobo tiwai mu yalio,
te ha ebo ąį sigo pągąnobo tiwai yalio.
16 Agai ena dali dene mabo sę mu yalio.
Te agai eno tobolu tǫba aiya tųbo tiwai elama,
eno kele degela tagalobo tiwai yalio.
17 Eno homu nagame elama,
wiegi yai homu elama me bidibeo.
Tama eno bugagia bidibo kolesaga te gegeda palalio.
18 Tama tibaso, eno te Genuai Bidigo
ena tau somainogo tonalubo sę ebo, te usugobeo.
Tama ena tǫde bobobage sogo bidigobeo, te homu ebao.

19 Ena te subigila wau bilibo bidi tiwai bidiyu,
tama eno ena genuai sęgę dabe kone ebao.
Tama tego enabolo dene mobao,
te dwai ha ebo ąį tuai dene tiwai ebao.
20 Tigidali sogo eno te sę dabeba kone ebo digi,
eno homu sęgę mu ebao.
21 Tiali goli, eno gasa nai me homu kone yali,
tama tialigo te tibogo eno Genuai Bidigo
ena tau somainu bomo elama, mu tonalubao.
Te nai dabe da e dao.
22 Tigidali sogo Genuai Bidigo da
homu dene eyu, tau sabo sę elama,
tama agai daba homugo kęą peyu,
da godolo mu ebo dao.
Tama agai te kolesaga munu me siligobeo.
23 Menio. Te agai te kolesaga tigidali bubugade gesi
noma pedalobo tiwai ebo dao.
Genuai Bidi, nago te homugo kęą pabo kolesaga
da dali tigidali sogo ebo dao.
Nago te kolesaga te wiegi yai mu dao.
24 Eno homugo eno meba nai dabede
moni homu igi homu ebao.
Genuai Bidi deli tama ena usu dao.
Tama tibaso, eno agai ena tau somainu
bomo elama, tonalubao.

25 Genuai Bidigo te aga gegelama,
tama agai augwali tau somainu tonalubo we bidi
dali wiegi yai sę ebo dao.
26 Te we bidi augwali dua bidiyu,
Genuai Bidigo augwali te boi bidi dabego nogode
ma oda somainu tonalubo kolesaga eyu da,
te wiegi yai dao.
27 Tama me ma, te bidi dabe augwali gesi bidide
gagalama,
te kolesaga ebo eyu da, te usu dao.

28 Te Genuai Bidigo te bidi me delibolo sęgę
mabode da,
teda te bidi agaduba bidigi pelama,
penane pania sai elaluao.
29 Teda Godigo aga tau sabo homu yali bogo.
Tama tiyu, agai aga digi aiyaba
elaluama, tama tonaluao.
30 Te bidi dabego aga nabo gede
nogo sawaligo elebaso da,
tama aga dali dwai po waiyu ebaso da,
teda agai augwaligo te tama
sę emainu sula tagalamainao.
31 Genuai Bidigo aga tigidali sogo
tudi ola magobeo.
32 Agai te bidi dabebolo sęgę mabo dao,
tiali goli nosali agai augwali hobede ebo dao.
Magi baso meni, aga da, te we bidi godolo mu ebo God
dao.
33 Tama agai augwali dene me sęgę mabode
agai wiegi yai homu me ebo menio.
34 Tama tibaso, bidigo te da kalabuside bidibo Juda
bage dali dwai sę ebaso da,
teda Genuai Bidigo te koneaibao.
Ma, bidigo te Ugwadu Mu Bidibo God dali hagoma eyu,
tama gasa bidi dali doloba pai kolesaga isąbaso da,
teda Godigo te sę ebo bidi sugobe da, agawe?
Ma, bidigo te po tų ebo kolesaga doloyu,
gasa bidiba dene mobaso da,
teda Genuai Bidigo tede hagela homu mu yaibao.

37 Te Genuai Bidigo usu da hasia wasiąyu da,
teda bidigo magi sę pedalumainu ebo usugobeo.
38 Te Ugwadu Mu Bidibo Godigo naga te we bidi
bugagia bidimainu ebo dao,
ma augwali te genuai sęgę somainu ebo dao.
39 Tama tibaso, bidi me bididubadi,
te Godigo agai yali dwai sę wei ponoyu,
dene mobaso da,
teda te bidigo Godibolo wado po olamuo.

40 Dago dena kolesaga, me dena bilibo
kolesaga dagalama, bugagia suao.
Tama dago dwai kolesaga tagalama,
tama da Godiba ma aselainao.
41 Te dago te Ugwadu Mu Bidibo Genuai Bidiba gedu
haluasa po wabo si,
dago dena homu ugwadu daide naga elaluyu,
gedu haluasa po wagimio.
Tama dago e tiwai po wao,
42 “Dago nage dali hagoma elama,
tama dago sęgę sai dao.
Tama nago dago sęgę sela sąsiąyu,
tama da te nago gedude dwagi yai ma pedalubeo.
43 Nago da dali sębę dwai mu elama,
tama nago da dali hobede me yai menio. Menio.
Nago da pobeasa pelama, tama nago da elama, isilai dao.
44 Nago da dali sębę elama,
tama nago naga olo palia sai dao.
Te nago naga digi te genuai pǫgo halua selama,
tama dago gedu haluasa po wabo
nage pageba sabolabo
usu emainogo tiwai me yai menio.
45 Nago da aiyaba elaluai dao.
Tama te meba Israel hani isąwai gasa hanigo da te olo
dwai nai tonobo tiwai elama,
meda mu yai dao.
46 Dago boi bidi dabe tigidaligo da
posobo po hauwa wai dao.
47 Te boi bidi dabego da elama, te da wi elama,
me da tulalumainu yabo nai dabe ilalio.
Tama da sese tama dolama, tagalainu yali.”
Dago te tobage gedu haluasa po wainao.

48 Eno te hobedai we bidi dolama elalubo sulama,
tama ena hobede mu elama,
tama ena gela waligo gela ųga tǫba tulalubo dao.
49 Eno gela wabo togogobeo.
Tama tiyu, gela ųga sesemane sogo aiyaba dulaibao,
te sula sisąma soabo ąį tiwai yaibao.
50 Ena gela odubadi, te Genuai Bidigo aba tonama,
tama da homu kone eboba usu naibao.
51 Eno ena taun we dabe augwali
dwai mu bidibo suali.
Tialima, ena homu sęgę genuai mu ebao.

52 Te bidi mebago ena dali olo dali
boi bidi homu elama,
tama ena olo dali elama, isilainu yali.
Tama augwaligo ena bidigo ba pobeasa pabo tiwai yai.
53 Te augwaligo ena te genuai tǫ dedageba sąnama,
tama ena dedagede bidibadi masigi ugwadu sąbo
tiwai yali,
te ena ela muainu.
54 Tama me te genuai ąįgo ena mesegelama,
tama eno homugo ena poma peyu isigowe homu
yali.
55 Genuai Bidi, ena dolama mu bidiyu,
tama ena isai bidigo bulude bidibo
tiwai bidibo ąǫ yali.
Tama nago ena tau somainu, eno nage i wali.
56 Eno e tama po olama, i wali,
“O Genuai Bidi, nago eno gela wabo
odao, nago olo pania sigio,” wali.
Tama nago eno te i wabo po odai dao.
57 Tama nage ena pageba aselama,
tama nago enabolo “Wi igio,” po wai dao.
58 Genuai Bidi, nago ena tau selama,
tama nago te eno boi bidi dabe aiyaba elaluai dao.
Nago ena augwaligo nogode ma oda selama,
tama ena bugagia bidibao.
59 Genuai Bidi, nago te bidi dabego
ena dolobo sę ebo nago suai dao.
Tama tibaso, nago augwaliba po tų elama,
nago ena tau selama,
te bage augwali aiyaba elalubo sę yao.
60 Genuai Bidi, nago koneani,
augwaligo ena dali boi bidi homu genuai mu ebao.
Augwaligo ena dali haniani dwai kolesaga
geme yabo homu hauwa ebao,
tama me augwaligo ena dali dwai po te obao.
62 Tigidali bubugade augwali po minama, posolu weyu,
ena dolabo po gegeyu ebao.
63 Suao! Te augwaligo sę elama,
tama augwali toma tubo sogo da,
augwaligo ena posobo balia po wabo dao.
64 Genuai Bidi, nago augwaligo
te dwai kolesaga koneama,
tama augwa te dwai kolesaga dolo ma wei ponao.
65 Nago augwaligo homu kolesaga dolama,
i ola mabo po olama,
tama augwali sese tama dolao.
66 Nago augwali dali sębę elama,
tama augwali sese pobeasa pelama,
tama augwali sese tama mu silao,
te augwali e tǫde deli me bidigobeo.